Aktualne terminy

Nižej nalicone terminy stoje teke w śišćanej wersiji Nowego Casnika wótśišćane.
Jolic měniśo, až znajośo wažny abo zajmny termin, kótaryž serbsku zjawnosć zajmujo,
a cośo jen našym cytarjam k wěsći daś, ga pósćelśo jen nam z e-mailom abo faksom
(glej menij „Redakcija“).

ŹO, GA, CO? ZAPISK TERMINOW (35/2010)

Gižkojske kubło/Gut Geisendorf
Fotowa wustajeńca
Wót 28. awgusta až do 6. oktobra se pokažo wustajeńca „Tak som ja to wiźeł”. Ernst-Ludwig Bach, Peter-Heinz Junge, Gerhard Kiesling, Uli Kohls, Peter Le­ske, Erich Schutt a Horst Sturm – fotožurnalisty kupki „Signum” – dawaju ze starymi fotami póglěd do poł lětstot­ka nimskich a mjazynarodnych stawiznow.

Chóśebuz/Cottbus
Rěcny campus
Srjodu, 1. septembra, zeger 9.30-12.00 zmakaju se zajmce serbskeje rěcy ned pśi Sprjewinem młynje. Wusokeje wódy dla musy planowane cołnowanje wupad­nuś. Wjeźenje buźo nimske – pśez tam­­njejše towaristwo – a k tomu serbske roz­grono z Wernerom Měškankom a ma­­minorěcnymi ze Žylowa a Depska pśi ka­feju a mlincach. Pśizjawjenja pšosym pód numerom rěcneje šule (0355) 79 28 29.

Serbske blido
Srjodu, 8. september, zeger 19.00 pśepšosyjo Christina Kliemowa do Serb­skego muzeja na diskusijny wjacor. Te­ma buźo „Domowina – zjadnośeń­stwo zjawnego pšawa? Pro a kontra“. Di­­skusijne partnarje budu pšawiz­nik Heiko Kosel, Harald Końcak a Pětš Petrik.

Mólarska źěłarnja
„Chóśebuz wiźony ze serbskimi wócami” jo tema źěłarnje, nawjedowana wót Klausa Bramburgera. Wóna se zachopijo pětk, 10. septembra, zeger 15.00 a skóńcyjo njeźelu, 12. septembra, a płaśi 32 euro. Zmakanišćo jo pśed Serbskim muzejom w měsće. Wobźelniki mógu źěłowu techniku sami wuzwóliś, musy pak swójske materialije a źěłowe srědki sobu pśinjasć. Pśizjawjenja pšosym pód numerom rěcneje šule (0355) 79 28 29.

Rěcne konsultacije
Pokšacujuce wukniki serbskeje rěcy mógu se zasej pla Erwina Hanuša radu holiś. Blokowe zarědowanja (pětk 3 góź. wótpołdnja a sobótu 3 góź. wót zajtšego) budu w septembrje 10./11., 17./18., 24./25.
Pśizjawjenja pšosym pód numerom rěcneje šule (0355) 79 28 29.

Brjazyna/Briesen
Jubilejny kokot
Sobotu, 4. september, wót zeger 13.00 łapaju muske kokot. Źiśecy kokot wótmejo se w pśestawce.
Njeźelu, 5. september łapaju žeńske kokot a to wót zeger 14.30.

Turnow/Turnow
Žnjowny swěźeń
Sobotu, 4. september, wót zeger 14.00 łapa młoźina kokot.
Njeźelu, 5. september, jo wót zeger 14.00 rejtowanje wó kołac.

Nowa Niwa/Neu Zauche a Tšupc/Straupitz
Pó jsy ducy
Na serbskich slědach w Nowej Niwje a Tšupcu móžośo drogowaś sobotu, 4. septembra, zeger 9.00 až do 14.30. Pó Nowej Niwje buźo Was wjasć Měto Pernak, roźony Nowoniwaŕ. W Tšupcu móžośo se woglědaś tamne zajmnostki. Wósebnosć w Trajdowem skłaźe su dolnoserbske słucharske stacije.
Interesenty se pśizjawiju pód numerom rěcneje šule (0355) 792829.

Dešno/Dissen
Wótworjenje wustajeńce
Njeźelu, 5. septembra, zeger 15.00 se wótwórijo wustajeńca „Žyźe a palona zemja”, pśigótowana wót kursistow Ludoweje wusokeje šule wokrejsa Sprjewja–Nysa. Woglědaś móžośo keramiku a patchwork, kofej a tykańc se daś słoźeś a na Jaroslava Pukača a jogo Fujaru słuchaś.

Slěpe/Schleife
Wótwórjenje wustajeńce
Na wótwórjenje wustajeńce „Přirodnje/Pśirodnje” z wobrazami Marity Christoph pśepšosyjo Serbski kulturny centrum Slěpe. Zarědowanje buźo pónjeźele, 6. septembra, zeger 18.00. Lawdaciju změjo Sonja Rönsch, grajotej gerca Kerstin a Tobias Strauß. Wustajeńca buźo pśistupna až do 30. nowembra.

Bórkowy/Burg
Fotowa wustajeńca
Wót 8. septembra až do 6. oktobra jo w Domje zmakanjow wiźeś wustajeńca „Rědnučki Taiwan” z fotami wót tai­wanskeje pśirody, folklory a nabóžniny a z njewšednymi wobrazami z powětša.

Kurowy koncert
Sobotu, 11. septembra, zeger 15.00 rejujotej na jawišću Bórkojskego swěźenišća Nimsko-serbski ansambel Žylow a ansambel Pśijaśelstwo z města tradicionelne reje.

Wětošow/Vetschau
Namša
Pśiduca serbsko-nimska namša buźo njeźelu, 12. septembra, zeger 10.00 w Serbsko-nimskej dwójnej cerkwi.

Janšojce/Jänschwalde
Woplěwanje drastwy
Lapu wězaś njamóžo wěcej wjele luźi. Šula za dolnoserbsku rěc a kulturu jo za to kurs z Brigitte Brülkowu organi­zěrowała. Kurs se zachopijo sobotu, 18. september, zeger 8.45 w serbsko-nim­skem domowniskem muzeju. Chto taku ma, dej pšosym swójsku, cysćonu lapu sobu pśinjasć. Pśizjawjenja pšosym pód numerom rěcneje šule (0355) 79 28 29.

________________________________

6. Noc muzejow we wokrejsu Sprjewja-Nysa
Sobotu, 4. septembra, móžośo zasej muzeje našogo wokrejsa wuzgónjowaś. 33 muzejow jo zajmny a bogaty program pśigótowało. Dokulaž buźo Wam za­wěsće śěžko z teje kopice něco wubraś, smy za Was kopicku pórucenjow zestajili. Dokradnjejše informacije namakajośo teke w interneśe pód: www.lausitzer-museenland.de

● Chóśebuz/Cottbus
W Serbskem muzeju „Wóstanjo wšo hynacej“. Muzikalisko-kulinariski program póbitujo jěze z jagłami a serbsku folk-muziku z duo „Barlinska droha“. Zastup: 3,50 €, pónižone 2,50 €.

● Bórkowy/Burg
Domowniska śpa pokažo film „Sommer im Spreewald“ z lěta 1952. W srjejźišću filma stoj žywjenje w Błotach, wósebnje cołn ako transportowy srědk za seno, wójce a woły. Zastup: dermo

● Dešno/Dissen
„Małe ludy, wjelike spiwy“ buźo moto w Domowniskem muzeju. Duo Weiß grajo na gitarje spiwy Sinti a Roma, pěsnikarja Björn Andresen a Bernd Pittkunings wót dańskeje resp. serbskeje mjeńšyny pśipowěźetej: „My smy prěd­ne byli“ a Klaus Bernd Günther z Friziskeje wulicujo tšojeńka a grajo na gitarje. Zastup: 4 €, pon. 2 €

● Drjowk/Drebkau
We Serbskej tkajarskej śpě wjeźo wuměłcowka Regina Herrman pśez swóju wustajeńcu „Duch studnje, nykus a druge bajkowe póstawy Łužyce“ a wulicujo wó Serbach. Zastup: 1,50 €, pon. 1 €, źiśi 0,50 €

● Janšojce/Jänschwalde
Wjednica Serbsko-nimskego domowniskego muzeja Ursula Starikowa Wam doporucyjo: „Našo moto lětosa jo ‚Kak jo žywjenje něga na lanźe tak było.’ We srjejźišću stoj to pjerjedrěśe. Žeńske z našogo chora budu we burskej drastwe pjerka drěś. A to z luštnymi spiwami, tak ak to něga jo było. Naše gósći mógu sami wopytaś a sobu cyniś. Teke bajki a powěsći wulicowaś buźo kněni Paukerowa. Za muziku jo dujar­ska ka­pała zagronita. Kjarcmarka pjaco zasej dobre mlince.
Zeger 18.00 wótwóri­jomy nowu wó­sebnu wustajeńcu ‚Grody a kněžkojske domy ze Šlazynskeje a Łužyce’ wót historikarja Siegfrieda Kohlschmidta. Muzicěrowaś buźotej jogo syn Kai Uwe a syna syn Giacomo Kohlschmidt. Wu­stajeńca wóstanjo až do nowembra.
Rownocasnje wótwórijomy teke hyšći jadnu wobstawnu wustajeńcu w groźi. Titel jo ‘Modrośišć něga a źinsa’”
Zastup: dermo

● Móst/Heinersbrück
W Serbskej burskej śpy zachopijo se zeger 17.00 kabaretowy wjacor „Co se Waš gójc wopšawźe mysli“ z dr. Jörg Vogelom.Zastup: dermo

-----------------------------------------------------------------
Kokotowy terminy 2010

● Sobotu, 11. september:
w Rogoznje/Willmersdorf
na Górach/Guhrow (zabijanje kokota)
w Prjawozu/Fehrow (30. jubilej, mło­źina a wóženjone łapaju dwa kokota)

● Sobotu, 18. september:
w Drjenowje/Drehnow

● Sobotu, 25. september:
W Turjeju/Tauer (Superkokot a 14. Bal žnjowych kralow)

-