Janšojce/Jänschwalde. Nalětne wjedro lětosa rolnikarjam derje góźi, nalěto jo se we cełem derje zachopiło – jo nam wobwěsćił wjednik janšojskego agrarnego drustwa Horst Hanška (Hanschke) (62) na našo pšašanje. Dešća jo se z chylami radnje wjele napadało, wósebnje w aprylu a měrcu, a doněnta žedna wjelika suš njejo nastała. Wjedro jo było z casami zymne a w nocy jo pór raz marznuło, pśez to tšawa na łukach rosćo a zdrjajo pómałem. To prědne secenje zachopijo se stakim akle něnto, we tom tyźenju, wó dwa tyźenja pózdźej ako w normalnych lětach. „To pak njejo na škódu, te zernka maju wěcej casa, aby wuzdrjali“– měni Hanška. Ako rolnikaŕ ma wón jano tšach pśed pśeliš jěsneju lěśojskeju górcosću (Hitze) w aprylu, wót 25 do 30 °C – ta sama pak na gluku njejo pśišła. Lěc žni wupadnu derje, to njedajo se hyšći zwěsćelowaś – to wjedro ga se móžo hyšći wšako pśeměniś.