Z Popojc/Papitz. 17. měrca togo lěta buźo se w Popojcach w gmejnje Gołkojce staś něco wažnego a rědnego. Ten źeń ga kśě oficialnje wuswěśiś a wótcyniś nowy gmejnski dom. Njejo to nowe twarjenje, ale něgajšny konsum ze casa DDR, a ten su w slědnych mjasecach docełego wobnowili, wutwarili a rědnjejšy wugótowali. „Wót gmejny smy dostali material, a za te twarske a rucnikarske źěła smy se za wětšy źěl sami starali“, jo nam wulicował Harald Ramot, južo młoge lěta wejsny prědkstojaŕ w Popojcach. Ako slědne su napórali nowe špundowanje z platami, a teke moderne toalety su załožyli. Napóraś kśě hyšći mału baru, źož mógu pón pśedawaś wšake k piśeju. Toś ten gmejnski dom njejo jano myslony za tamne wjelike Tradicijne towaristwo a za wejsnu młoźinu, ale za wšych tych něźi 450 wobydlari. Teke rentnarje mógu se how pón zmakaś na pśikład k swójej gódownicce.