Drjenow/Drehnow. Te tśi mósty pśez Małksu, ako tudy we gmejnje maju, napóraju gmejnskej raźe starosć. Fachowa ekspertiza jo wupokazała, až ten pódzajtšny móst – na serbske Šołśic móst pomjenjony – jo brašny. Jogo pórěźenje by płaśeło 30.000 euro. Dokulž gmejna te pjenjeze njama, ga su nejpjerwjej dejali jězdźenje pśez njen śěžkim awtam zakazaś: takim, ako waže wěcej ako 12 tonow. Ten zakaz njepłaśi za rolnikarske awta. Bóžko, zas a zas se wiźi, až teke 40 tonow śěžke nakładne awta dalej tudy jězdźe, wósebnje k jazorkoju Karkoška. Gmejnska rada njejo spokojom, až turnojske agrarne drustwo jězdźi pśez Šołśic móst ze swójim wjelickim gnojnym transporterom. To jo šołta Erich Lehmann kritizěrował zjawnje na woklapnicy w januarje.