Chóśebuz/Cottbus. Chto buźo dol­no­­łužysku župu zastupowaś we zwězkowem pśedsedarstwje Domowiny? – dla togo pšašanja su se łamali głowu cłonki župnego pśedsedarstwa na wobradowanju wałtoru tyźeń w Serbskem domje. Župje jo pěś městow pśiźělonych, ale wóno njebuźo lažko je lětosa wobsajźiś – jo nam wulicował cłonk pśedsedarstwa Horst Adam, ak jo se na wobradowanju wobźělił. Głowna zgromaźina Domowiny buźo 25. měrc w Wórjejcach, a tam budu wšykne gremije wótnowotki wu­zwólowane wordowaś. Župan Harald Końcak jo na wobradowanju gronił, až jadna wina lažy we tom, až jano małko dolnołužyskich kandidatow móžo górnoserbsku rěc derje rozměś. To pak jo na wob­ra­do­wa­njach zwězkowego pśed­­­sedarstwa Do­mowiny trjeba. Běrow Do­mowiny a cłonki pśedsedarstwa deje se góźecych luźi pytaś.