Picnjo/Peitz. „Pśeměnjenje góspodarskich strukturow buźo se móc pśewjasć jano z brunicu, jeje buźomy pótrjebaś nachylu wěcej kaž pjerwjej. A tak dłujko, ako problem składowanja energije njebuźo rozwězany, njebuźo se we tej wěcy nic pśeměniś“, jo powěźeła direktorka Picańskego amta Elvira Hölznerowa pśi wótwórjenju konference Pśeměnjenje góspodarskich strukturow w picańskich stronach stwórtk tyźeń w Mozaikowej šuli. Jeje póznaśe zawěśce njejo wutrjefiło zmyslenje wšyknych organizatorow: Zeleneje ligi, chóśebuskego krejza ewangelskeje cerkwje a Instituta za strategiske wuwiśe w Liechtensteinje. „Njeglědajucy na wšake měnjenja k tej wěcy som napněta na to, což študańce su mimo pśedsuźenja wumyslili“ – jo direktorka pśistajiła.