Kśišow/Krieschow a Wjerbno/Werben. W casnikach a medijach su južo pśed tyźenjami skjaržyli, až su lětosne trajdowe žni špatne. Ale pla našych burow wjelgin wšake wuglěda, smy wuzgónili.

Rozgranjali smy se mjazy drugim z Ulijom Starkim, zagronitym za wobźěłanje pólow a łukow w Kśišojskem drustwje. Wón jo wulicował, až trajda jo zapšawym wjelgin derje stojała. Jano to dešćojte wjedro w žnjeńskem casu jo te nabranki na pśerězny niwow pónižyło. Žni su se śěgnuli až do slědnego kóńca tyźenja, źož su slědny raps a slědne žyto žněli. Mjaztym su musali cesto pśestaś, dokulaž jo se padało. Kśišojske njekśě trajdu pla drugich wósušyś daś, dokulaž muse za to pśidatnje płaśiś. Dla togo su musali wócakaś te krotke casy, źož trajda jo była južo na póli wusušona. Starke ale njewiźi, až jo kwalita zernkow pśez to južo špatnjejša. Skerjej pśez to, až jo mjaztym zele rostło a pśez to, až jo dešć te kłoski dołoj tłocył, njamaju lěpše nabranki.