Źinsajšny źeń jo cesto taki, až młode luźe njewěźe, na kake pówołanje deje se orientěrowaś, co kśě wuknuś abo studěrowaś. Dwatyźeński wuknikojski praktikum jo pśedpisany w 9. lětniku a bitujo młogim wěstu orientaciju, cesto dosć pak to njedosega.

Te problemy pak Olivia Frencelojc njama. Wóna kradu wě, co co raz źěłaś: ako diplomatka. Až ten zaměr njejo małučki a až jo jano mało luźi, kótarež to dojśpiju, to sama derje dosć wě. Dla togo ta wuknica Dolnoserbskego gymnaziuma (DSG), kótaraž pśiźo něnto do 11. lětnika, se derje pśigótujo. Južo pśiducne lěto co swójo póžedanje we Wenkownem amśe wótedaś. Olivia jo južo tam była na dnju wótwórjonych źuri a jo se informěrowała. Gaby ju wzeli, by měła wukubłanje a studium na tamnem campusu. Z drugimi studentami njeby nic zgromadnje wuknuła, wšykno gótuju tam za sebje.