19lětna Sarah Glenzojc z Chóśebuza jo južo pśecej kśěła něco ze źiśimi měś cyniś. Ale co? Snaź raz ako wótkubłarka w źiśowni źěłaś? Aby se wuskoboźiła we myslenjach, až take pówołanje jo za nju ta pšawa droga a až co jo napšawdu wuknuś, jo wóna pó 11. klasy wobzamknuła, až buźo nejpjerwjej dobrowólne socialne lěto absolwěrowaś. A to we serbskej źiśowni Mato Rizo w Žylowje.

„Źiśi su prima! Ja rada pśiglěduju, kak wóni rostu a se wuwijaju a ja mam frejdu jich nowe wěcy wucyś“, wulicujo Sarah z rozpalenim. Něnto chyla se to lěto ku kóńcu, a wóna buźo jano hyšći do kóńca awgusta w źiśowni źěłaś. Co jo ten cas jej pśinjasł? „Ja som něnto kradu wěsta, až to jo to pšawe pówołanje za mnjo“. Wót nowego šulskego lěta buźo togodla zachopiś wuknuś na wótkubłarske w šuli Nimskego źěła za kubłanje dorosćonych (DEB – Deutsches Erwachsenen-Bildungswerk) w měsće.