Dnja 18. awgusta jo Johannes Kapelle na smjerś znjeglucył. Wón jo był znaty wójowaŕ za dalejwobstaśe swójeje jsy Prožym.

Wón jo se naroźił dnja 16. junija 1936 w Barlinju, mama jo była z Wjelceje. Rad jo kśěł na gólnikarja wuknuś, ale jo se na kóńcu rozsuźił za studim na ceptarja. Ako jo był 14 lět stary, jo zachopił, na orgelach graś. Až do kóńca žywjenja jo pśewóźował namše na orgelach w Prožymje. W Prožymje jo Johannes Kapelle spóznał swóju žeńsku a jo se wóženił w lěśe 1961. Z togo casa jo wón tež źěłał ako bur – žeńska ga jo pśinjasła „wyrtšaft“ sobu. Tśi źiśi jo wóna jomu póroźiła. Dłujke lěta jo Johannes Kapelle dalej dawał swóju wobšyrnu wědu ako ceptaŕ na rolnikarskej šuli w Chóśebuzu. Cełe žywjenje jo aktiwny był w towaristwach, a jo wórdował „motor zgromaźeństwa“. Tak jo groniła Marja Elikowska-Winklerowa, ako se dopomnjejo: „Raz smy byli na woglěźe w Prožymje z maminorěcnymi Serbami. Nam jo Johannes Kapelle wulicował wó stawiznach jsy, aktualnej situaciji a na kóńcu jo na orgelach koncert dał.“