Běła Góra/Byhleguhre. W Kastanijowem dwórje w Běłej Górje jo kśěła Domowina lětosny superkokot 24. septembra swěśiś. Ale z togo njebuźo nic. Historiski źěl běłogórjańskego gósćeńca jo se w nocy do 23. awgusta wótpalił. Wót togo wjelikego twarjenja stoje jano hyšći zakładne murja, mjazy nimi laže něnto zwuglone bałki a dołoj padnjone cygle. Krajna droga pśez Běłu Góru jo była na tom dnju zastajona, wognjowa wobora jo tam była z 110 wobornikami. Wóni su nanejmjenjej wugbali, až ten nowy zal a dalšne twarjenja hyšći stoje.
We tom domje jo bydliła kjarcmaric familija z dogromadu pěś luźimi, kótarež něnto pytaju nowy pśebytk. Jo to Neumannojc familija z dwěma góletkoma a stara mama Marion Gutšymtowa. Na gluku njejo se jim nic stało. Ale wšykno su zgubili.