Drjowk/Drebkau. Sabine Winkelmannowa jo gjarda. Jeje wukniki su mjenja rostlinkow za tu toflu w Kózlem do serbskeje rěcy pśestajili. To jo był zajmny a wótměnjaty nadawk w wucbje za serbsku rěc, jo groniła. Dokulaž njejsu mógali te mjenja rostlinkow we swójich šulskich knigłach namakaś, su musali tam pilnje slěźiś. Pśez to su wjele pśinawuknuli w serbskej rěcy. Až na pśikład te mjenja tych rostlinkow njejsu wšuźi jadnake. „Smy se rozsuźili za błośańske mjenja“, jo wóna Casnikoju groniła. Ale to su musali wukniki wšykno nejpjerwjej wuslěźiś, kake te wšake mjenja su, až dajo tak wjele wariantow. Roswi-tha Baumertowa wót Serbskeje tkajarskeje śpy w Drjowku jo jim rostlinowe knigły dariła, aby to wšykno wugbaś mógali. Weto su hyšći dalšnu pomoc trjebali. Katalin Porackojc wót tkajarskeje śpy jo jim wobstarała radu fachnikow, aby wšykne mjenja pšawje wuzgónili.