Tak ako wšuźi w Dolnej Łužycy, tak teke we wokrejsu Sprjewja/Nysa su młoge bomy, kenž su wjelgin stare, tłuste a wusoke, kšuśe šćitane. To groni, až su wjelgin gódne. Wóni su zapisane do lisćiny pśirodnych pomnikow (Naturdenkmäler). Dogromady 41 takich bomow stoj na tej lisćinje, ako jo wokrejsny sejm SPN na pósejźenju w juliju wobzamknuł. Taku lisćinu maju južo wót lěta 2007, ale něnto su ju aktualizěrowali. Za wětšy źěl su to duby, lipy a platany. Mjazy nimi jo kšasny dub na Górach, Napoleonowa lipa na kjarchobje w Kózlem (Casel), wjelgin mócny dub na jsy w Popojcach a dalšny wjeliki dub pśi głownej droze w Turjeju. Ten dub na Górach dej byś wokoło 160 lět stary. Na starem wobrazu z pomnikom za wójakow ze jsy, wótmólowanem wokoło lěta 1870, jo ten dub južo k wiźenju. Jo pak hyšći małki a śańki.

Na Górach maju hyšći dalšne rědne bomy. Pśi wejsnej droze stoj dogromady 108 lipow, kótarež kužde pěte lěto wobrězuju. Wósebnje gjarde pak na Górach su na carnu brjazu, ako jo narosła pśi sćažce do Smogorjowa. To jo wjelgin rědki bom, wón jo doma w Pódpołdnjowej Americe.