Slědny tyźeń smy lazowarjam k wěsći dali, až bramborske kněžarstwo ma wótněnta „krajny plan k zmócnjenju serbskeje rěcy“. Pód tym wusokim mjenim chowa se zapisk 50 konkretnych statkow, kótarež kněžarstwo co wuwjasć abo južo pó źělach wuwjadło, aby poziciju serbskeje rěcy zmócnili a serbskorěcne zgromaźeństwo pódpěrali. Bramborska ministarka za kulturu Martina Münchowa (SPD) jo plan w juniju w kabinetu pśedstajiła, pśed dwěma tyźenjoma su w bramborskem parlamentu dla njogo diskutěrowali.

Plan jo něco nowego: stat njespokoj se wěcej z tym, až eksistěruju kazni, ale jogo zastojnstwa a ministarstwa su sebje wustajili plan we duchu nowelěrowaneje Serbskeje kazni, co kśě aktiwnje cyniś a kak pomogaś. To jo jim pśikazał parlament łoni w lěśu. Wšykne frakcije su jadnogłosnje wobzamknuli, až kněžarstwo musy we prědnej połojcy legislaturneje periody taki plan wuźěłaś. K energiskemu póstupowanju na tom pólu góni jich teke Europska charta regionalnych a mjeńšynowych rěcow, kótaraž ma status nimskego pšawa.