Mužakow/Bad Muskau. Študańce Akademije za twórjece wuměłstwo z Waršawy organizěruju how južo tśi lěta wuměłske zmakanja na wobyma bokoma Nyse. Tomu projektoju gronje Muskau art project. Což pśi tom stwóriju, jo wustajone na rozpokazowanju w Mužakowje a Zelenej Górje. W lěśe 2014 jo wuměłcow interesěrował park ako mejstarske wugbanje cłowjeskego rozyma. Łoni su portretěrowali wobydlarjow Mužakowa a Łęknice. Lětosa su se pśiwobrośili pśijaśelstwu, ak jo zwězało stwóriśela mužakojskego parka wjercha Hermanna Pücklera z wjelikim pólskim basnikarjom Juliu­szom Słowackim. Pücklerowej parka w Mužakowje a Rogeńcu stej Słowackego wjelgin inspirěrowałej. Wón jo se zazwólił, až buźo teke drogowaś do Bliskeje Jutšneje, kradu k tym městam, źož Pückler jo póbył. Słowacki jo we listach swójej mamje pisał, až kśěł rad žeńsku z orientaliskego rodu póžyś. Jo-li take póžedanje we njom wubuźiła šklobowka Machabuba, kótaruž Pü­ckler jo kupił na wikach w Kairu a do Mužakowa sobu pśiwjadł? Literarne historikarje nic k tomu njegronje.