Źěłanišćo za serbske kubłańske wuwijanje Chóśebuz ABC jo se rozžognowało ze sobuźěłaśerku Silvju Jehnesoweju, kenž na pśedwuměńk wótejźo. Wóna jo ceptariła wěcej ako 40 lět. Ta studěrowana ceptarka za pśedmjat polytechniku(źinsa GŹT – góspodarstwo-źěło-technika) jo na kóńcu wucyła na Dolnoserbskem gymnaziumje.

Jeje kórjenje laže w serbskem. Starki a starka stej ga serbski powědałej a stary nan jo sam ceptarił w Bórkowach. Togodla jo se zajmowała za serbšćinu a jo w lětach 2009-2012 hyšći raz studěrowała a to za pśidatnu kwalifikaciju za wucenje w pśedmjaśe serbšćina (masterske wótzamknjenje), organizěrowane wót uniwersity w Lipsku. Toś jo pótom teke serbsku rěc na Dolnoserbskem gymnaziumje wucyła.

W slědnyma šulskima lětoma jo kněni Jehnesowa teke za ABC źěłała a se how wósebnje pśiwobrośiła wucbnemu materialoju za pśedmjat GŹT. Tak jo mógała lětosa serbskorěcna mapa za wuknikojski zawodowy praktikum wujś.