Pśisłucharje serbskego radija wót rbb su woblutowali, až jo woblubowana moderatorka Hannelora Handrekojc na wuměńk šła. A z tym, až wóna njejo wěcej tam, jo se dalšna źěrka wótcyniła. Hannelora Handrekojc ga jo była jadna wót tśich redaktorkow serbskego radija: Marion Stenselowa jo ta zagronita redaktorka, tśeśa redaktorka jo Martina Golašojc. Rbb jo to źěłowe městno nowo wupisał, a něnto jo jasne, až buźo Katarzyna (Kasia) Fidekowa tam wót 8. maja ta nowa redaktorka.

Pśisłucharjam serbskego rozgłosa jo ta 28lětna južo dawno znata. Wót lěta 2005 źěła młoda Pólacka južo wótergi za serbske radijo, a to ako licha sobuźěłaśerka. Wótrosła jo Kasia Fidekowa w pólskej małej jsy Stare Czaple blisko Mužakowa. Jo pak serbsku rěc južo ako wuknica nawuknuła. Kasia jo bydliła w serbskem internaśe w Chóśebuzu a jo na Dolnoserbskem gymnaziumje swóju abituru cyniła. Marja Elikowska-Winklerowa jo ju w młodych lětach do „nimskeje Łužyce“ pśiwabiła a ju wjele lět spěchowała. Nastało jo wšykno pśez zgromadne zwucowanje dolnoserbskego a pólskego źiśecego chora. Tegdy jo Kasia sedym lět młoda była.