Serbski folklorny ansambel Slěpe z.t. jo měł 3. měrca swóju głownu a wólbnu zgromaźinu. Alfons Wićaz jo se z jogo dłujkolětnym organizatoriskim wjednikom Wolfgangom Kotissekom rozgranjał.

Kaku bilancu jo ansambel mógał śěgnuś?

W. Kotissek: My kužde druge lěto glědamy slědk na to, což smy dojśpili a tež gódnosćimy naše wustupy we tom casu. Wót 1973, to groni wót załoženja našogo ansambla, až do kóńca 2016 smy 1247 razow wustupili. K tomu pśiźo wjele internych wustupow ako pśi jubilejach. Tegdy su pśišli wšykne naše cłonki ze slěpjańskeje wósady, źinsa wóni pśidu z 18 wšakich jsow a městow. Nejdalšej pšec bydlitej naš tšubaŕ a basist, kótarejž pśijěźotej z Hamburga a Lipska. Z Ćisowa pśijěźo familija Zahrodnikec z klarinetu, guslami a dudami. W našom ansamblu gótuju sobu studenty a wuknjeńce. My musymy na wjele glědaś, aby mógli wšykne gromaźe probowaś a wustupowaś. Łoni smy wugótowali pěś wustupow. Dla smjerśi mójeje manźelskeje jo była wětša pśestawka. Něnto comy se napinaś a byś wěcej aktiwne.

Wy sćo wjele lět ansambel nawjedowali. Kótare dožywjenje běšo za Was to nejzajmnjejše?