Bórkowy/Burg. 5. maja buźo bramborski ministaŕ za kubłanje Günter Baaske w bórkojskej šuli. Tamna zakładna a wuša šula by dostała wjelike problemy, gaby to nowe póstajenje za serbsku wucbu płaśeło. A to teke pó tych nowšych wuměnjenjach, kótarež su Serby a jim pśichylone politikarje wuwójowali. Krajny sejm ga jo gano póstajił, až muse kubłańske ministarstwo (MBJS) nacerjenje za póstajenje tak wobźěłaś, až dej se pśiměriś sakskim wobstojnosćam. Tam ga zwětšego płaśi minimalna licba wót pěś wuknikow.

Z tym pak njejsu Dolnoserby spokojne. Pla nas ga jo rěcna situacija špatnjejša, mamy wjele mjenjej maminorěcnych a wóni njejsu tak koncentrěrowane we jadnej šuli. Dla togo njesmějo tam minimalna licba póstajona byś, gronje Serbska rada, iniciatiwa starjejšych a dalšne.