Zaspomniśo se: www.nowycasnik.de!
Kšac doprědka: Našo łopjeno jo wótněnta w interneśe
Nowe lěto jo pśinjasło redakciji Nowego Casnika pólěpšenje, na kótarež su młoge južo dlejšy cas njesćerpnje cakali. Wótněnta jo našo serbske łopjeno teke w interneśe wiźeś, a to pód adresu www.nowycasnik.de.
Naša redakcija buźo wótněnta wubrane pśinoski ze śišćaneje wersije Casnika kuždy tyźeń do interneta stajaś, a wušej togo wše aktualne terminy z rubriki „Źo, ga, co?“. Wšykne artikele mógu woglědarje w interneśe komentěrowaś.
Ako wósebnje dobra wěc dej se wuzwignuś fotowa galerija, źož se budu wózjawjowaś fota wót tšojenjow, wó kótarychž se w Casniku pišo. Wótergi jo to tak, až redaktory na młogem zarědowanju „nastśělaju“ ze swójimi fotoaparatami ceły měch rědnych bildkow, na papjerje pak mamy rědko rum za to, aby je wše wótśišćali. Něnto jo tomu problemoju wótpomožone: wšo, za což njebuźo žedno město we našom łopjenje, buźomy stajiś do interneta. Smy wjelgin glucne, až tu móžnosć smy dostali we pšawem casu, nježli w našych jsach se chopijo zapust swěśiś.
Spomnjeśa gódny jo teke dlejšy artikel wó historiji Casnika wót jogo załoženja w lěśe 1848 až do źinsajšnego. Wužywarje interneta nadejdu wjele originalnych tekstow a scanowanych bokow starych wudaśow, fota redaktorow a wjele drugego.
Z tym, až smy něnto w interneśe pśibytne, jo se wótpórał dalšny brach, kótaryž jo młogi kritizěrował – wótněnta mógu luźe naš Casnik teke online wupołniś formular za abonement Casnika a se jen na jadnory part domoj skazaś.
Slědkoju smy stajili do interneta wše praktiske informacije ako telefonowe a faksowe numery, postowu adresu a teke e-mailowe adrese redaktorow.
We pśichodnem casu dej se internetowa prezentacija wudopołniś z interaktiwnymi elementami ako newsletter abo online-napšašowanja k wubranym temam.
G. W.