Mukwaŕ dostanjo pomoc z Dešna
Dešanarje a Strjažowarje su póbyli na Zelenem tyźenju
Znajośo wy Mukwaŕ? To jo małka wjaska blisko Kalawy, jano wokoło 160 luźi tuchylu tam bydli. A dokulaž njamóžo sama eksistěrowaś, jo se pśizamknuła wětšej gmejnje Luckaitztal. Wobej wěcej njesłušatej źinsajšnym nimsko-serbskim stronam, ale wobej mjeni pśeraźijotej, až stej byłej raz serbskej. Muckwar – na serbski Mukwaŕ – pśiźo wót słowowu „muka“ a „wariś“, a Luckaitz jo dostał swójo pomjenjenje wót słowa „łuka“. Tak to prof. Eichler we swójich knigłach „Die Ortsnamen der Niederlausitz“ rozjasnijo
.
Hyšći žednje njejo měła gmejna Dešno/Strjažow, źož ga jo to serbske na młogi part źinsa mócnje žywe, z Mukwarjom něco cyniś. Ale něnto stej se naraz bejnje bliskej. Pó tom, až běšo se łoni w Dešnje 9. bramborski wejsny a žnjowny swěźeń wjelgin derje raźił, jo lětosa Mukwaŕ pśewzeł ten nadawk, pśigótowaś a pśewjasć lětosa 15. a 16. septembra ten 9. centralny bramborski swěźeń. Ta mała kopica luźi co to zwónoźeś, ale jim budu wobydlarje z cełeje gmejny k pomocy.
Slědny tyźeń pónjeźele su Mukwarske ten zagronity a nic rowno lažki nowy „amt“ nastupili. Na bramborskem dnju na Zelenem tyźenju w Barlinju jo wjelika delegacija Dešanarjow a Strjažowarjow jim jen symboliski pśepódała.
Bramborski ministarski prezident Matthias Platzeck, bramborski ministaŕ za rolnikarstwo Jörg Vogelsänger a druge politikarje su byli pśi tom wažnem tšojenju w bramborskej hali, kótaruž su pśed 20 lětami załožyli, pódla. Pśi tom jo Matthias Platzeck hyšći raz pśed tymi wjele woglědarjami wuchwalił wjeliki angažement Dešańskeje gmejny. Te su ze swójimi samskimi mócami pokazali, kak móžo se taki swěźeń pšawje a rědnje pśewjasć, jo gronił. Dešański šołta Fred Kaiser jo zlubił Mukwarjarjam pomoc a radu, a Dešanarje a Strjažowarje su se byli ten źeń wobjadne, až se pódaju w septembrje do Mukwarja. Te žeńske z „Dešańsko-Strjažojskeje delegacije“ su měli serbsku drastwu woblaconu. Z tym su wubuźili zajm teke w drugich halach teje nejwětšeje agrarneje wustajeńce na swěśe, na kótarejž jo se lětosa pśedstajiło pśisamem 60 krajow cełego swěta.
Jadna Dešanarka jo měła ten źeń wósebnje rědny nadawk. Christin Hasackojc, młoda Domowinarka a aktualna bramborska žnjowna kralowka, jo ministarskego prezidenta sobu pśewóźowała pśi jogo woglěźe k tym 71 stojnicam (Ständen), we kótarychž jo 300 wustajarjow z cełeje Bramborskeje wabiło za swójo źěło a produkty. Mjazy nimi su byli z Dolneje Łužyce Turnojska flejšarnja, piwarnja Kirchner z Drjowka (mjazy drugim ze swójim „Serbskim piwom“), fabrika šokolady z Lěšćow/Horno a wšake błośańske firmy a towaristwa.
„To jo była za mnjo wjelgin rědna wěc a we tom casu, źož som ta kralowka, ten nejwažnjejšy wustup“, jo groniła studentka rolnikarstwa. Ministarski prezident jo ju wjelgin wuchwalił, až jo se rozsuźiła za burske powołanje a až co wóstaś we Łužycy.
Horst Adam