Katalin – basistka w rock-band „Wild Garden”
Wob tyźeń źěła ako sekretarka w Domowinskem župnem běrowje
Wót oktobera 2008 ma Domowinska župa Dolna Łužyca nowu sekretarku. W župnem sekretariaśe sejźi nět Katalin Poraccyc (26) z Chóśebuza pśed computerom. „Wupisanje za městno sekretarki som cytała łoni w Nowem Casniku. Ja som tencas pytała za źěłowym městnom, ale njejsom kśěła gótowaś wšo. Źěło sekretarki pśi Domowinje jo se mě zdało zajmne a wótměnjate, toś som se procowała wó pśistajenje”, dopomnjejo se młoda měsćanarka. Rada by dlej ako jano 30 góźiń wob tyźeń źěłała, což pak njegroni, až Katalin kuždy źeń dypkownje domoj źo. Cesćej wóstanjo dlej, aby dodatne nadawki dopołniła. Źěło źo jej jano tak wót ruki a w stresowych situacijach wóstanjo měrna. To wšykno sebje wažy jeje šef, zastupny jadnaŕ Domowiny Harald Kóńcak: „Naša sekretarka jo pilna, spěšna a ma organizatoriski šyk. Ja by sebje pak žycył, až njeby była taka sćicha.”
Dobra duša a źowćo za wšo
Co ma župna sekretarka wšykno cyniś? Mjazy drugim jo wóna zagronita za wobšyrnu korespondencu, za pisanje referatow a listow, za knigływjeźenje a zestajenje statistikow. Pó pótrjebje pyta za spisami a dokumentami w župnem archiwje a se stara wó kopěrowanje wažnych pódłožkow. „Pśigótowała som dolnołužyskim delegatam mapy z rozpšawu a dalšnymi informaciskimi materialijami, a to za župnu głownu zgromaźinu w Janšojcach a za głownu zgromaźinu Domowiny kóńc měrca w Chrósćicach. Kuždy z tych 43 delegatow, ako su Dolnu Łužycu w Chrósćicach zastupowali, jo dostał sobu na drogu tak pomjenjony lunchpaket. Za to som wšykno wobstarała, pśigótowała a zapakowała”, rozkłaźo Katalin Poraccyc. Pódobnu słužbu wugbajo, gaž se pśewjedu w Serbskem domje zarědowanja Domowiny. Wobźělnikam wari kafej, pśigótujo jim pśikusk a nosy taski a talarki na blido. Pózdźej wšo zasej rumujo a wobmywa.
Wótrosła jo dwójorěcnje
Poraccyc Katalin jo wótrosła w Hungorskej. Wót małkego jo powědała hungorski a nimski. Akle pó politiskem pśewrośenju w Nimskej jo familija pśeśěgnuła do Dolneje Łužyce. Swóju abituru jo gótowała na Dolnoserbskem gymnaziumje, za tym jo študěrowała pódwjacornu slawistiku w Lipsku. Pó jadnom lěśe jo studium chyśiła. Nachylnje jo źěłała w Serbskem instituśe a hynźi na wobgranicony cas. Katalin serbski derje wumějo, pśez to až jo wuknuła na serbskem gymnaziumje a pśez mamu, ako jo redaktorka pśi dolnoserbskem radiju, kubła se na rěcnem pólu dalej. Na wałtorach wobźělujo se na serbskem kursu za pókšacanych, kótaryž Šula za dolnoserbsku rěc póbitujo sobuźěłaśerjam serbskich institucijow. Katalin powěda styri rěcy: hungorsku, serbsku, engelsku a nimsku, wušej togo tšochu pólsku rěc z wjelgin dobreju fonetiku.
Komponěrujo za serbsku kupku
Wóna pak ma hyšći dalšne talenty. Ako awtodidakta jo nawuknuła graś na gitarje, na keyboarźe a basu. Z pomocu keyboarda a computera teke komponěrujo. „Muzika jo była pśecej źěl mójogo žywjenja. Ako som była góle, jo mója mama mě pśedspiwała a na gitarje grała”, groni ambicioněrowana młoda žeńska. A dokuluž smy narske, nam do detajla rozkładujo, na kaki part a z kakeju software swóje muzikowe kuse twóri. Ach jejko, to jo za lajka napšawdu komplicěrowana wěc.
Toś comy lubjej pokazaś na to, což móžomy derje rozměś. W nadawku muzikowego redaktora rozgłosa rbb a serbskego komponista Ulricha Pogody jo Katalin Poraccyc skomponěrowała kus z titlom „Do spanja”. Za serbski rozgłos jo teke južor młoge popowe title spiwała. W nadawku Nimsko-Serbskego ansambla Chóśebuz-Žylow jo stwóriła štucku za serbsku źiśecu rejowańsku kupku „Swětlaška”, a to za ptaškoswajźbarski program. Za tu samu kupku buźo něto hyšći wěcej gótowaś. „Někotare štucki debu sebje wumysliś za ten nowy gódowny musical, kótaryž změjo swóju premjeru znowa w adwentskem casu.”
Pópšawem jo Domowinska sekretarka skerjej tšuchła, šym wěcej se jej źiwamy, až grajo (na basu) w Chóśebuskej cover-rock band „Wild Garden”. W band jo ta nejmłodša a ta jadnučka žeńska mjazy tymi gercami. To se pomina južor wjeliku porciju sebjewědobnja a zamóžnosć, se pśesajźiś ako toś take młode śeletko. „My grajomy w kjarcmach, zwětšego w ‘Camicaze’ w měsće”, pśeraźijo basistka. Jeje band jo se profilěrowała na pólu pisaneje rokoweje a popoweje muziki ze1960tych do 1970tych lět.
A. D.