Prědny raz zas woklapnica we Wjerbnje
Wjerbno/Werben. Pśiducny tyźeń pětk dožywiju Wjerbanarje premjeru z wažnym komunalno-politiskim charakterom. Prědny raz pó něźi 25 lětach su wóni a z nimi teke luźe z wejsneju źělowu Brama a Rubyn kazane na woklapnicu. „Toś ten stary serbski wejsański nałog smy wótžywili, dla togo až naše bergarje su sebje to wóspjet žycyli. Šołty a gmejnske parlamenty we našych susednych jsach pśepšosuju kužde lěto na toś taku tradicionalnu wobydlarsku zgromaźinu. Toś njocomy wěcej z boka stojaś. Wósebnje cłonki kulturnego wuběrka su se wó zasejzawjeźenje woklapnice we Wjerbnje starali.”
To jo Casnikoju gronił šołta Joachim Dieke. We swójej rozpšawje na 16. januarje w hotelu „Ku gwězdźe” buźo woklapaś to stare lěto a wulicowaś wó tom, což ma gmejna lětosa prědk. Jaden wót tych wažnjejšych projektow buźo rekonstrukcija kněžkojskego domu von Seidlitz, w kótaremž maju towaristwa swóje rumnosći a někotare pśebytkarje swójo bydlenje. Inwestěrowaś co gmejna do planowanja za nowotwaŕ Smogorjojskeje, Dwornišćoweje a Kaiseroweje drogi a Slězneje gase, a to w tśich wótrězkach.
A. D.