Tenraz wobraze tych młodych
W Chóśebuskem Serbskem domje nowa wustajeńca „Momentowe wobraze“
Dotychměst jo LODKA w Serbskem domje z lěta 1992 juž 81 wósebnych wustajeńcow wugótowała. Za wětšy źěl z wobrazami mólarjow, głownje su to byli starše, dorosćone wuměłce, lajske a profesionalne. Jano rědko su tudy wustajali źiśi abo młodostne swóje wuměłske źěła. Togodla móžomy se wjaseliś, až ta nejnowša wustajeńca, ta 79., pokažo, kaki talent maju źiśi za mólowanje a kreslenje. Jej se groni „momentowe wobraze – Momentaufnahmen“, a wóna jo se slědny tyźeń stwórtk w klubowni Serbskego domu wótwóriła.
K wiźenjeju su na wušej 70 wobrazach motiwy, kótarež su Witaj-wukniki a wuknice pśi Witaj-campu 2010 a 2011, kótaryž jo wugótował Rěcny centrum WITAJ, a wuknice a wukniki Dolnoserbskego gymnaziuma, ako bydle w internaśe, zapópadnuli. Te motiwy su wjelgin wšakorake – pśiroda, zwěrjeta, struski, woblica a wjele drugego.
Tych małych wuměłcow nawjedowała jo Lenka Theurichowa. Za wuměłsku zaběru w Dolnoserbskem internaśe stej byłej sobu zagronitej Ana Baumgärtelowa a Doreen Hufnagelowa. „Ja som tym źowćam a gólcam jano groniła, kak mógu mólowaś a kresliś, te motiwy su se sami wumyslili a wupytali. Su pśedstajili to, což su wiźeli a co jo jich wósebnje pógnuło“, jo Lenka Theurichowa, ako sama wjelgin rada mólujo, w swójej lawdaciji powěźeła. To jo wjelgin wažne, až pódpěrujomy a spěchujomy kreatiwnosć młodych luźi, to wóni cełe žywjenje trjebaju, nic jano za mólowanje.
Wjeliku chwalbu su dostali młode „wuměłce“ teke wót Klausa Bramburgera, znatego mólarja z Gubina. „To jo wjelgin dobra wěc, až se how wužywaju wše te móžnosći teke zwenka šulskeje wucby, aby se to wuměłske twórjenje źiśi spěchowało. Jo zajmne, z kakimi wócymi wóni glědaju na ten swět, a až su se wupytali za to wšake techniki, teke moderne, w mólowanju“, jo wón gronił.
Na wótwórjenju teje noweje, wjelgin zajmneje a rědneje wustajeńce, kótaraž buźo až k 13. aprylu, su žedne z tych małych „mólarjow“ pśichwatali a su se na pśijazny part pócesćili a mytowali. Su byli gjarde, až su jich źěła dostali take wusoke zjawne pśipóznaśe. Teke te tśi młode gerce z Chóśebuskego konserwatoriuma, kenž su grali na klawěrje a akordeonje, su dostali mócny aplaws pśibytnych.
H. Adam