Młoźina, ta rěc jo śi wužytna!
W gymnaziumje su pśewjadli informaciski źeń
Chóśebuz/Cottbus. W awli Dolnoserbskego gymnaziuma su zachadny stwórtk pśewjadli „kubłańske wiki“ – informaciske dopołdnjo, źož wukniki jadnastego lětnika su dostali móžnosć, se informěrowaś, kake pówołańske perspektiwy kiwaju jim pó wuchójźenju šule.
Prědny źěl jo był pósćony móžnosćam, kótarež su dane absolwentam serbskego gymnaziuma, ako maju znaśa serbskeje rěcy. Wjednik Rěcnego centruma w Chóśebuzu Měto Nowak a redaktorka Nowego Casnika Ines Neumannojc stej wugótowałej multimedialnu prezentaciju, w kótarejž stej zgromaźonym wuknikam pokazałej a nadrobnje nalicyłej wše wobcerki a pówołańske póla, źož serbska rěc móžo źěło pytajucym byś na wužytk. Zawěsće pśidu kuždemu pśi tom nejpjerwjej serbske institucije do mysli, ale z tym ta paleta móžnosćow njejo dawno wša wobpśimjeta – su wukniki zgónili. Rěcywěda, zastojnistwo, wuměłstwo, turizm, nowe medije, wugótowanje mody a druge kreatiwne pówołanja, to su póla, źož ze znaśami serbskeje rěcy ako pśidatna kwalifikacija jo móžno se profilěrowaś abo specializěrowaś a se slědkoju pśesajźiś napśeśiwo konkurentam mimo takeje interkulturneje kompetence. „Njedajśo pó šuli wašym znaśam serbskeje rěcy wusnuś“, jo Nowak młoźinu napominał.
Pó pśednosku su wukniki mógli pśiś do rozgrona ze zastupnikami serbskich institucijow: Rěcnego centruma Witaj, Domowiny, serbskego rozgłosa, Nowego Casnika, Šule za dolnoserbsku rěc a kulturu, Źěłanišća za kubłańske wuwijanje ABC a drugich. Organizatora kubałańskich wikow – gymnazium a Witaj-centrum – stej pśi tom napśeśiwo slědnym lětam nowu drogu šłej: Kužda institucija jo tenraz měła swójo blidko w awli. Małke kupki wuknikow (pó styrjoch abo pěśoch) su k nim pó rěźe woglědali a měli pśigótowane pšašanja. Na ten part jo se ned nawlakło wósobinske rozgrono, w kótaremž młoźina jo mógła wšo zgóniś, což jo kśěła, a zastupniki institucijow su měli móžnosć za swójo pólo wabiś.
Wó móžnosćach, kótarež wuknjecej młoźinje wótwórijo serbska rěc, zgónijośo za tyźeń.
G. Wieczorek
Komentary k artikeloju
Myslim se, až młode Serby we Dolnej Łužycy mógli by na zachopjeńku samske pjenjez zasłužyś na funkcjonerowanje roznych ideji a w pśchoźe normalnje pśi tom źěłaś, napśikład pódla tych cołnowarjow,turistiskich informacijow,muzejow,gosćencow,lodow a drugich. Pśi cołnowanju, pśedawanju a drugem, mógu k turistam abo mjez sobu na serbski powědaś ga tu cołnary njamogu abo tšachujo se na serbski groniś. Teke pódla tych serbskich gósćencow a wjesnych młoźińskich klubownjow móžno kabareta pśez cełe lěto graś a druge na serbski gótowaś. Se myslim, až była by to dwejcy raza dobra ideja, dokulaž wjelu turistow z wukraja rady by na serbski w Błotach/Spreewald dorozměś se a pitśku žywej serbskej rěcy dolabowaś (dožywiś). Teke tu serbska młoźina wiźěła by trěbnosć a prěstiža dolnoserbskeje rěcy. Tak rowno móžno z kabaretowym graśim w turne pó Błotach/Spreewald ducyś. Móžo tek do wukrajow (do Pólskej).