Z klasiskeju muziku do nowego lěta
Chóśebuz/Cottbus. Zajźony pětk su lubowarje klasiskeje muziki dožywili w Serbskem domje w měsće rědny cas. Koncert pód motto „Muzika mjazy casami – wósebny koncert na proze k nowemu lětu“ jo iniciěrowała a wuměłski nawjedowała pianistka Heidemarie Wiesnerowa, kótaraž póchada z Łužyce a bydli w italskem Mailanźe. Na njom su wustupili – mimo njeje sameje – serbska mezzosopranistka Tanja Donathojc, znaty fidlaŕ Paul Rosner a klarinetist Daniel Roy.
Koncert jo se zachopił z etidu as-dur Frederika Chopina. Pśisłucharje su słyšali mjazy drugim kuse swětoznatych a serbskich komponistow, mjazy drugim namšarsku ariju Wolfganga Amadeusa Mozarta, poem za husle, klarinetu a klawěr Detlefa Kobjele, satirisku kompoziciju „Kaž z wašnjom je/Wie üblich“ Jana Cyža a wjelgin žywu a kompoziciju Maurice’a Ravela „Tzigane“, w kótarejž su se jawili motiwy cygańskeje muziki z Hungorskeje a Špańskeje.
Na gódowny cas su nawězali gódowne kjarliže w serbskej, českej, pólskej a nimskej rěcy, spiwane wót Tanje Donathojc.
Pśisłucharje, kótarychž jo było pśiamem 40, su słyšali teke prapremjeru: ekstra za toś ten koncert jo serbski komponist Ulrich Pogoda – na póstarcenje kněni Wiesneroweje a kněza Roya – skomponěrował kantilenu za klarinetu a klawěr „Hommage à K. A. Kocor“. „Kompozicije Kocora mam ja wjelgin rad, we nich pokazujo se nejlěpjej wóna serbska duša. A dla togo som dał mójej kompoziciji titel, kótaryž cesći togo wjelikego komponista“, jo Ulrich Pogoda gronił Casnikoju. Za skomponěrowanje teje kompozicije jo trjebał wósym góźin. Klarinetist Daniel Roy, kótaryž jo ju zejgrał, jo ju měł za wjelgin raźonu a jo chwalił Pogodu, až jo napisał ju kradu „pó spiwarsku“ (což groni, až melodija klarinety se rowna we wjelich aspektach cłowjeskemu głosoju; togodla gronje muzikarje klarineśe cesto „spiwarski instrument“).
Wóny rěd nowolětnych koncertow eksistěrujo 12 lět. Pjerwjej su je pśewjedowali w Nimsko-słowjańskem domje w Gubinje, a tenraz pak jo Serbski dom wuměłcam swóje źurja wótcynił.