Mało woglědarjow na nazymskem koncerśe
Janšojska Domowinska kupka jo kritiski glědała na slědne lěto
Janšojce/Jänschwalde. Janšojska kupka Domowiny jo wótźaržała w Krawcojc kjarcmje swóju głownu lětnu zgromaźinu, na kótarejž jo se wobźěliło 70 Domowinarjow. Nježli jo pśedsedaŕ kupki (a zrownju prědkstojaŕ Janšojc-Jsy) Günter Zeleńk pódał rozpšawu, jo wustupił Janšojski žeńskecy chor z pó źělach serbskim repertoirom.
Mjazy wjelimi aktiwitami kupki w zajźonem lěśe jo pśedsedaŕ wuzwignuł wjeraški wejsnego žywjenja gmejny, kótarež su Domowinarje sobu organizěrowali. To su byli pśedewšym 200lětny jubilej cerkwje, superkokot a muzejowa noc, kótaraž jo pśiwabiła do Janšojc teliko woglědari ako žednje do togo. Teke w komunalnej politice jo kupka wažna móc w gmejnje – pśi slědnem komunalnem wuzwólowanju su styrjo cłonki kupki se wuzwólili do gmejnskeje rady a dweju cłonkowu su wobydlarje wuzwólili ako wejsneju raźcowu. Teke do wokresjnego sejma w Baršću su kśěli nastajiś kandidata, pśez njedorozměśe pak su lisćinu z pódpismami wótedali na wopacnem amśe. Dla teje formalneje zmólki njejo se kandidat kupki do wuzwólowanja pśipušćił. Za to jo se Zeleńk zagronił.
Teke druge njeraźenja njejsu se zamjelcali: Tśi wažne tšojenja w žywjenju gmejny, kótarež kupka pó tradiciji organizěrujo – to su nazymski koncert, kjarmuša a larbaty bal (Maskenball) – su lětosa pśiwabili mało luźi a kupka njejo wudane pjenjeze nabrała, což jo póžrěło wěcej ako połojcu cłonkojskich pśinoskow. Drugi problem jo, až licba cłonkow lažko wóteběra, a wósebnje śěžko jo nowe młode cłonki dobyś. Na snadnem lětnem pśinosku wót 18,50 € na lěto njamóžo to lažaś, a Zeleńk jo zwěsćił, až how musy se Janšojska Domowina wěcej pilnowaś.
Kupka spěchujo wósebnje Witaj-projekt we jsy: Do Witaj-kupki w źiśowni chójźi 13 źiśi a dalšne 70 źiśi wuknjo w Krabatowej šuli serbsku rěc. Njespokojom jo se pśedsedaŕ pokazał z tym, až w horśe se serbska rěc njespěchujo, a to lěcrownož maju tam wukubłanu Witaj-wótkubłarku.
Za wósebne wugbaśa su se na zgromaźinje z flašu wina a struskami wucesćili młoge cłonki: Ursula Starikowa za wutwaŕ wejsańskego muzeja, kótaryž jo mjaztym srjejźišćo zjawnego žywjenja we jsy, a za spěchowanje serbskeje rěcy; Liza Měškowa za to, až jo dostała Myto domowiny 2008; a wjednica młoźiny Mandy Richtaric za swójo pilowanje a organizaciju aktiwnosćow młodych Janšowarjow.
Janšojsku kupku jo wuchwalił zastupny jadnaŕ Domowiny Harald Końcak, kótaryž jo zlubił swóju pomoc pśi rozwězanju problema z hortom. We swójom nagronje jo pśedstajił tuchylny staw jadnanjow dla financěrowanja Załožby za serbski lud a jo kritizěrował, až kraja Sakska a Bramborska njejstej hyšći na pówušenje zwězkowego pśipłaśonka reagěrowałej a se wopěratej swój późěl wótpowědnje pówušyś (to jo wuměnjenje, kótarež jo zwězk krajoma napołožył).
Slědkoju jo Końcak pśepšosył Janšowarje na Zapust/Ptaškowu swajźbu Serbskego ludowego ansambla. Glědajucy na to, až wobźělenje na takich tradicionalnych zarědowanjach stawnje wóteběra, jo dał k wobmyslenju, lěc su wóni hyšći na casu a lěc njejo trejba wó nowych strategijach a formach kultury pśemyslowaś.
Pó oficialnem źělu su cłonki byli kazane na reju.
Janšojska kupka ma tuchylu 127 cłonkow a jo z tym jadna z nejwětšych w Dolnej Łužycy. We jeje „złotem casu” pak jo jej pśisłušało wěcej ako 200 wobydlarjow jsy.
G. W.