Źiśam organizěrujomy swěźeń kužde lěto
Na Górach smy wjelika aktiwna a wjasoła Domowinska młoźina
Góry/Guhrow. Naša młoźina ma 25 aktiwnych młodostnych, na kótarychž móžoš se spusćiś. Toś tu rozwjaselonu kopicu fryjnych pójmaju naše šefowki młoźiny: Katja Neubertojc, Lysanne Rybackojc a Franziska Glodnijojc.Musymy pak groniś, až smy byli něga 50 młodostnych we jsy.
My by se wjaselili, gaby wšykne młodostne ze jsy wu nas sobu źěłali. Weto smy wjelika kopica, kótaraž źaržy gromadu. Móžomy groniś z gjardosću, až našo gromaduźaržanje jo hyšći pśibrało w zajźonem połtera lěśe.
Naša młoźina jo wjelgin aktiwna. Kuždolětnje organizěrujomy swěźeń za źiśi k Dnju źiśi, swěźeń swěśałkow za gmejnu w adwentskem casu a cołnowanje w Błotach za našu młoźinu.
Mimo togo se wobźělijomy na projekśe „48-góźinska akcija“ wokrejsa Sprjewja-Nysa, na wejsnem sportowem swěźenju a na tradicionalnem domowniskem a drastwinem swěźenju w Bórkowach.
Nałogi woplěwamy teke: My camprujomy a zapustujomy, stajamy majski bom, wugónijomy złe duchy z jatšownym wognjom a lětosa comy zabijaś kokota. Žnjowny swěźeń pśewjeźomy ga prědny raz pó lětźasetki dłujkej pśestawce.
W našej klubowni swěśimy wjele rědnych swěźenjow a mamy spódobne wjacory.
Wšykne swěźenje financěrujo młoźina sama. Zawěsće smy dobyli wjele sponsorow. Naše sponsory su firmy z Gór. Nejwětšej sponsora stej Matthias Troppa a Lutz Stierand.
Młoźina dajo tradiciji wótžywjeś
Wšykne su se ned zagórjeli za to naraźenje, lětosa zabijaś kokota. Ale kak musymy toś taki nałog pśigótowaś? Co pópšawem wóznamjenijo to zabijanje kokota?
Pśi toś tom njepórěźe su naše šefowki ned reagěrowali a su konkretne nadawki rozdźělili. Smy se wó serbskem nałogu zabijanja kokota póinforměrowali w rozgranach z drugimi młodostnymi z wokolnych jsow a sebje fota woglědali. Mimo togo smy łoni dojěli do Smogorjowa a Rubyna na zabijanje kokota.
Slědkoju jo tak daloko! Něnto k prědnemu razoju comy zasej tradiciju žnjownego swěźenja swěśis. Za nas młodostnych budu to tśi dožywjenjow połne a zapśimujuce dny. Wšykne se na swěźeń wjasele. Weto ma kuždy měšane zacuśe. Ale njeměr se kněžy pśed kuždeju premjeru. Źowća budu wězaś stwórtk žnjownu kronu w pśijaznej gromaźe. Na wjacor pětk se z cełeju gjargawu pśipadajomy na wjeliki swěźeń.
Sobotu, 11. septembra, comy prědne zabijanje kokota na sportnišću (zeger 14.30) pśewjasć. My wuzgónijomy naše tśi žnjowne krale w tśich stacijach: Nejpjerwjej wopytaju naše gólcy z cepami tśi raze za sobu na cejźaŕ deriś. Pón wopytaju naše gólcy kokota złapaś a slědkoju budu naše źowća žaby karowaś.
Na kóńcu togo kokota ze pśesajźowanim pśedawamy. Za muziku a za jězu a piśa buźo starane, a dokulaž buźo lětosa prědny raz zabijanje kokota, jo zastup dermo. My se wjaselimy na Was!
Młoźina zas pódla na domowniskem swěźenju
Teke na lětosnem domowniskem a drastwinem swěźenju w Bórkowach ten tyźeń comy zasej byś prezentne. Tenraz pokažomy to zabijanje kokota, ale to gótujomy raz ceło hynacej. Naš kokot buźo Daniel Rattei a na senowej karje budu sejźeś žaby z plyša. Někotare gólcy budu z cepami deriś na gjarnc a my źowća buźomy nosyś serbsku swěźeńsku drastwu. Górjańska młoźina se prezentěrujo ako luštna měšańca z wjele žortami. Na 28. awgusće móžośo nas wiźeś we wobrazu 36 swěźeńskego pśeśěga.
J. Dünnbierojc