Komentar tyźenja: Nowy pomogaŕ w kubłańskem ministarstwje
Bramborske kubłańske ministarstwo jo zasajźiło głownoamtskego koordinatora za serbsku kubłańsku seś w Dolnej Łužycy. Tu nowosć jo wózjawiła Rada za serbske nastupnosći we slědnem Casniku (NC 08, 2. bok). Sobuźěłaśeŕ ministerstwa za kubłanje, młoźinu a sport Karl Fisher buźo zasajźowaś wótněnta 50% swójogo źěłowego casa za serbsku kubłańsku seś.
Stakim jo ta wušyna to pominanje serbskich zastupnikow dopołniła, což jo dobre a chwalobne. Nježli pak su do togo zwólili, smy musali dožywiś wjele njerozměśa, zabywatosći a casy teke ignorance napśeśiwo pótrěbnosćam serbskeje wucby. Njemusymy daloko se slědk mysliś, aby take pśikłady namakali.
Łoni ga jo ministarstwo wudało nowe ramikowe plany za sekundarny schójźeńk I, to su rědownje 7–10, a jo ceło jadnorje wuwóstajiło ten „serbski wótstawk (Absatz)“. A teke konkretne pokazki we wucbnych planach njejsu byli wěcej wótśišćane. Akle na protest Serbow su kšajźu we tych planach, ako su we interneśe wózjawjone, taki pasus zasej pśipisali. Ale te južo wuśišćane plany njejsu se pórěźili, a stakim njedajo se tej škóźe wěcej zajźowaś.
Dopomnimy se na ceptarku serbskeje rěcy na Dolnoserbskem gymnaziju kněni Panajcowu (Panneitz), ako jo połne źěłowe město pominała. Šulski amt ga jo lěta dłujko góźiny ceptarjow reducěrował, a ceptarjow serbskeje rěcy njejo pśi tom wobejšeł, lěcrownož rowno te nam feluju! Kněni Panajcowa jo slědkoju połne město dostała, ale nic na serbskem gymnaziju, ale we Teltowje, źož jo musała pótom ze źowku pśeśěgnuś.
Tych pśikładow by se mógało wěcej namakaś. Njedejmy wócakowaś, až buźo to ministarstwo naraz hynac na serbske nastupnosći glědaś. Ta zasadna situacija njebuźo hynakša. Ale Karl Fisher móžo – ako nam wjelgin pśichylony sobuźěłaśeŕ ministarstwa a šulskego amta – ze swójimi kolegami powědaś, a wšake, což to serbske nastupa, wujasniś. Z tym budu móc lěpjej rozměś, dla cogo wšake wěcy, ako Serbska rada a Domowina wót ministarstwa južo lěta dłujko pominatej, su za nas wažne. Pśedewšym ale možo naš nowy pomogaŕ na to glědaś, až take njedary a njegluki ako łoni, pó móžnosći se wěcej njestanu.
W ministarstwje se cesto mysle, až jano te pśistajone Serby jadne same wójuju za swóju wěc. Ta wěrnosć pak jo taka, až wóni wójuju pśedewšym we mjenju tych, ako su se k tomu pśiwucyli, až wušyna na serbske pótrěbnosći njeglěda, a togodla njejsu nawucone daniž pisaś na ministarstwo listy daniž protestěrowaś. Ten fakt se cesto ignorěrujo.
I. N.