Atrakcija we wjele barwach
Rozglědowański torm w Gatojskem rozwjaseleńskem parku se swěśi w nocy
Nowa Wjas/Neuendorf. Wót 17. julija jo na Barbuckej wušynje wótcynjony rozglědowański torm. Nasyp brunicoweju jamowu Chóśebuz-połnoc a Janšojce jo ze swójimi 30 mejtarjami nad mórjom dobre městno k tomu. Wót 57 mejtarjow wusokego torma ma ten kšasny rozglěd, kenž jo pó tych 272 stupach górjej šeł.
Ale teke za tych, za kótarychž jo to pśewusoko, jo ten torm wjelgin zajmna wěc. Pśi zemi su instalěrowali panorama-śpu. We tej śpě móžoš rowno to same wiźeś ako górjejce na tormje. We wusokosći jo instalěrowanych 8 kamerow, a pśi zemi 8 beamerow to pokažo, což kamery zapópaduju. K tomu pśiźo hyšći mały film, kenž jo Vattenfall dał producěrowaś a kenž pokazujo sceny z wšednego dnja brunicoweje industrije.
Pśi zemi jo teke instalěrowana wustajeńca. Amtska direktorka Elvira Hölznerowa jo pśi wótwórjenju z wjaselim groniła, až skóńcnje maju w Picańskem amśe teke wustajeńcu wó brunicy. Wót wuzgónjenja (Erkundung) až do rekultiwěrowanja tam wšykno pokazuju. Bóžko toś ta wustajeńca pokazujo w rědnych barwach jano brunicowu industriju, ale pśesedlenja a póśěženja luźi a škódy w krajinje tam njepśedstajiju, nanejmjenjej nic na póglědnjenje. We swójom nagronje jo amtska direktorka wuzwignuła jano w pozitiwnem zmysle žywjenje z brunicu. Žedno kritiske pśispomnjeśe k tomu z jeje guby njejo było k słyšanjeju. Tomu nowemu muzejoju napśeśiwo jo stajiła muzeje w Picańskem amśe, kótarež pokazuju serbsku kulturu. „Stawizny Serbow z 18. a 19. stolěśa“ pokazuju pó jeje měnjenju wejsańske muzeje a śpy pla Picnja. Až za wětšy źěl pokazuju serbsku kulturu z 20. stolěśa a teke žywu serbsku kulturu, to njejo naspomnjeła. Wustajeńca we tormje jo rědnje a modernje wugótowana a pokazujo něco z geologije a archeologije tak ako brunicowu techniku.
Až do kóńca oktobra buźo torm wótcynjony wob tyźeń zeger 11.00 až do 19.00, a na kóńcu tyźenja zeger 10.00 až do 20.00. Woglědanje torma płaśi 2 euro. 4. septembra buźo noc muzejow we wokrejsu, a pśi tom buźo torm teke dermo k woglědanju. Wósebna atrakcija jo, až torm w nocy se swěśi wót nutśika we wšakich barwach.
Pśi wótwórjenju stej Kai-Uwe Kohlschmidt a jogo syn Giacomo wustupiłej ako kupka Joule. Giacomo jo grał na cajonje, to jo bubon, źož móžo gerc sejźeś pśi bubnowanju. Jogo nan jo grał na sansuli, to jo dalejwuwiśe kalimby. Kalimba jo bejnje mały instrument, na kótaremž se grajo z palcami. Metalowe jězyki pśi tom zazněju. Muzika jo pśibytnych pśi wótwórjenju zagóriła.
I. N.