Měsćańska kupka jo ta aktiwnjejša w župje
Chóśebuz/Cottbus. Njejo spśegnawane, gaž twarźimy, až Chóśebuska Domowinska kupka se nejžwěcej angažěrujo za župu Dolna Łužyca. Pśedsedarka teje kupki Sabina Siegowa jo za to pomjeniła pśikłady na lětnej głownej zgromaźinje tyźeń stwórtk w Serbskem domje. Tak su se Chóśebuske Domowinarje ako Bjarnat Rjentš, Horst Adam, Jurij Koch a Angela Šurmannowa wótnowa do župnego pśedsedarstwa wuzwólili. Dowěra ako nowa županka jo dostała Chóśebuska Domowinarka dr. Madlena Norbergowa. Teke doněntejšny župan źěła sobu w měsćańskej kupce. To jo Pětš Petrik, zastupny pśedsedaŕ teje „wjelikeje“ Domowiny.
W swójej rozpšawje jo pśedsedarka śěgnuła tek na drugi part dobru bilancu. Tak su se cłonki w radnej licbje wobźělili na centralnych serbskich zarědowanjach w lěśe 2008. Chóśebuske Domowinarje teke byli w Serbskem muzeju – na Serbskich blidach a pśi góźbje wótwórjenjow wustajeńcow a sobu pódla su byli pśi wótwórjenju tśich wustajeńcow LODKI w Serbskem domje.
Łońske kupcyne zarědowanja su byli w februarje głowna zgromaźina kupki, w juniju swěźeń na dwórje Serbskego domu, w septembrje wulět do Zeleneje Góry, w nowemberje tradicionalna kjarmuša a w decemberje gódownicka. Ale to njejo hyšći wšo. Domowinska kupka w měsće wuźaržujo partnarstwo z Witaj-źiśownju „Villa Kunterbunt” a ma kupku škótowarjow, kótarejež cłonki jano serbuju. „Pódpěrowali su naše cłonki ze swójimi pódpismami iniciatiwu pśeśiwo nowym wuglowym jamam a pśed row Fryca Rochy smy połožyli strus pśi góźbje jogo 145. pósmjertnego narodnego dnja”, jo pśedsedarka reziměrowała.
Lětosa w januarje su wósebnje starše cłonki sebje woglědali program źiśeceje rejowarskeje kupki „Swětlaška” w DSG. Zajm wjelich cłonkow jo wubuźiło cytanje Jurija Kocha w Serbskem muzeju (5.2.). W źěłowem planje kupki su mjazy drugim zapisane dia-pśednosk wó woglěźe pla naslědnikow serbskich wudrogowarjow do Awstralskeje z cłonkom kupki Anu Kosacojc ako referentku (26.3.), serbske źiwadło z „Floppy Dolls” wó muzikaliskem běrowje za namakanki a za zgubjone wutšoby (14.5.) a woglěd na mjazynarodnem folklornem festiwalu „Łužyca 2009” w Hochozy (26.6.). Nazymu buźotej wulět do Varnsdorfa a kjarmuša.
Martina Kalzowa, pókładnica kupki, jo pódała financnu rozpšawu. Nježlic jo se zachopił spódobny źěł zgromaźiny, jo županka dr. Madlena Norbergowa informěrowała wó rezultatach studije studentow Instituta za slawistiku w Podstupimje. Łoni su se wopšašowali Chóśebuzarjow k temje Serby. Wóna jo k wěsći dała te pšašanja a k tomu wótegrona luźi. Studenty kśě sami něco napisaś wó swójej studiji za wózjawjenje w Casniku.
A. D.
Komentary k artikeloju
Mějśo źěk za korekturu. Nanejmjenjej we internetowem wudaśu smy tu zmólku pórěźili.
„Pśed row Fryca Rochy smy połožyli strus pśi góźbje jogo 145. pósmjertnego dnja” cytamy w artikelu, což wopšawźe wěrno njejo. Fryco Rocha jo se pśed 145 lětami naroźił a njejo zamrěł.
Pšašam se mimo togo, cogodla njejo połožyła Domowinska kupka strus na row - ako by se słušało -, ale pśed njen na puś?