Mejstaŕ klawěra a znajaŕ ludowych spiwow
Su spominali na Lubinskego komponista prof. Dieter Brauera
Lubin/Lübben. Njeźelu tyźeń su pśijaśele a familija spominali na komponista prof. Dietera Brauera. Źěłowy serbski krejz a Domowinska kupka Lubin stej ze Šulu za dolnoserbsku rěc a kulturu pšosyłej na wósebne wótpołdnjo pód motom „Spominamy na wjelikego syna města Lubin”. Brauer jo skóro 30 lět wuwucował na wusokej šuli za muziku „Hanns Eisler“ w Barlinju.
Na zarědowanje we woponowem zalu groda we Lubinje jo pśichwatało wušej 50 gósći z muzikowego žywjenja, wuměłce, něgajšne studenty, jogo ceptaŕ a suseźi, z Lubina, Stuttgarta, Kölna, Barlinja a z cełeje Dolneje Łužyce. We pśijaznych rozgronach su se dopominali na Dietera Brauera ako wuměłca a cłowjeka.
Serbski komponist Detlef Kobjela z Rogozna jo na njogo dopominał ako kolega, pśijaśela, komponista. Jo pśibytnych wopóznał z twórjenim Brauera. Na pśikładach z nagrawanjow serbskego rozgłosa rbb z archiwa jo gódnośił jogo twórjenje a jogo wjelgin dobre graśe na klawěrje.
Prof. Dieter Brauer jo se naroźił 1935 w Lubinje, łoni jo wumrěł. Z maminego boka jo był serbski, jo měł serbsku starku w Błotach. Jogo serbske kórjenje su jomu pśecej wažne byli. To jo se na wjelesy part pokazało we jogo muzikowem, komponistiskem zacuśu. Njejo był jano wuběrny znajaŕ serbskich ludowych spiwow, ale teke nowšeje a nacasneje muziki. We wjele ze swójich kompozicijow jo pśeźěłał serbske ludowe štucki, na pśikład „Měj ty dobru noc” a „Hanka źěšo Karlikojcam”. Pśisłucharjam su na tom wótpołdnju pśedstajili tej dwě štucce.
To wósebne pla Brauera jo było to, až jo perfektnje grał na klawěrje a jen ako instrument wobkněžył.
To se wótbłyšćujo w jogo kompozicijach, ale wósebnje we improwizacijach. Jo wusko gromaźe źěłał ze serbskimi wuměłcami a wustupował w cełej Nimskej a wukraju. Ako kolega jo se pokazał ako dobry kritikaŕ, ako luź – ako pśijaśel a humana wósoba. Dieter Brauer jo był rowno tak wobdarjony we kreslenju. Jo kreslił z pisanymi pisakami. Ten wósebny part wuměłskeje ekspresije jo se pokazał we młogich wustajeńcach.
Wopomnjeńske zarědowanje jo wobogaśił wustup źowki profesora Marje Susanne Pietrowski. Wóna jo grała na prěcnej flejśe dwa kuska, kótarejž jo jeje nan za nju komponěrował.
W pśiducnem Casniku buźomy wózjawiś wěcej wó profesorje Dieter Brauer.
MEW/I. N.