Wjacerjali su akle bejnje pózdźe
Młoźinski aktiw jo woglědał do Harrachova
Chóśebuz/Cottbus. Prědny kóńc tyźenja w decemberu su cłonki Młoźinskego aktiwa Domowiny měli kubłańsku ekskursiju. Na njej jo se wobźěliło 22 młodych luźi z Janšojc, z Bórkow, Dešna, Prjawoza, Pricyna, Kózlego, Škódowa, Depska a z města. Z nimi stej jěłej młoźinski koordinator Helmut Matik a Zaspowaŕ Bernd Kamjeńc.
Z busom su jěli do českego městaška Harrachov, ako lažy mjazy Kerkonošami a Izerskimi Górami pśi granicy z Pólskeju. Wóno jo znate ako centrum za zymski sport a wósebnje za skokanje ze sněgakami (Ski). Sněg pak njejo tam hyšći lažał, a togodla su se musali wumysliś alternatiwny program.
Pětk wjacor su wjelgin pózdźe k hoteloju pśijěli, dokulaž su měli problemy z busom. Tunel jo był wjelgin wuski a droga k tomu hoteloju jo była tšašnje nagła, tak až bus njejo mógł ju pśewinuś. Togodla su musali nałožyś wjele casa, a wjacerjaś su mógli akle zeger 22.30.
Sobotu su woglědali do stareje głažkarnje. Tamne wjeźenje jo było dwójorěcne: česke a nimske. Łužycanarje su se źiwali, wjele wót togo českego su rozměli. Wósebnje zajmna jo była pśisamem 300 lět stara tocarnja głažka. Ten wušej 100 lět stary drjewjany rěd funkcioněrujo hyšći źinsa derje. Wjelgin rědne głažki producěruju tam. Łužyske gósći su se źiwali tomu, kak dłujko tocenje jadnogo głažka trajo. Aktualna góspodarska kriza jo se tam dosć twardo wustatkowała. Wótbytk wołojowego kristala jo spadnuł, dla togo něnto producěruju kronowe swěcniki.
Młoźinski aktiw jo se teke mału priwatnu piwarnju woglědał. Pótom su sami sportowali. Dla togo, až njejo było žednogo sněga, su grali bowling. Źělili su se do tśich kupkow, ale tak, aby byli měšane. Na ten part su mógli lěpjej zeznaś młodostnych z drugich jsow. Pśez take wulěty ga dej młoźinski aktiw hyšći wěcej gromadu rosć.
Wjacor jo był rezerwěrowany za disco, a pśi tom su hyšći zmakali togo swětego Nikolausa, ako jo tam w tej nocy ducy był, a to gromaźe z janźelom a z cartom. Njeźelu wótpołdnja su byli zasej w Chóśebuzu. Młoźina jo wobzamknuła, až młoźinske kupki budu jadne k drugim woglědaś, aby se hyšći lěpjej zeznali.
I. N.
Komentary k artikeloju
Njerozmějom, cogodla dejała to byś \"kubłańska ekskursija\"? Dokulaž su młodostne woglědali staru głažkarnju a priwatnu piwarnju abo grali bowling a wjacor byli na disco? Take namakaš tež we Łužycy. Co su pśii swójom wulěśe nawuknuli? Bóžko wó tom nic njezgónijoš. Za to pišo I.N. wó njejasnych problemach z busom, což drje nikogo njezajmujo, gaž njejo podla był.
Wobcwibluju, až su młodostne \"wjele wót togo českego rozměli\", gaž serbski njepowědaju.