Diskusija dla Vogtowego pósudka
Cełkowny koncept Zgórjelskego wědomnostnika prof. dr. Matthiasa Theodora Vogta za dalšne spěchowanje serbskeje rěcy a kultury jo Załožba za serbski lud pśed krotkim do interneta stajiła, aby kuždy Serb a drugi zajmc mógał jen cytaś a se wólodowaś. Vogtowy koncept jo wubuźił diskusiju:
Harald Końcak, pśedsedaŕ bramborskeje Serbskeje rady: Jadna se pśi Vogtowej studiji wó wědomnostnu studiju. Ale we někotarych pasažach musym to do pšašanja stajiś. Gaž prof. Vogt na pśikład naraźijo, te Serby deje wudrogowaś do Kanady, pón njewěm, lěc jo to žort abo lěc jo to napšawdu pówažne pórucenje. Pó mójom měnjenju njejo ten Institut wót prof. Vogta swój nadawk dopołnił. Jogo nadawk jo był, z k dispoziciji stojecymi srědkami naźěłaś pósudk (Gutachten). A měritko by dejało byś financne dogrono až do 2015. A nic wěcej. Nastała jo pak wjelika financna źěra. Vogt jo ga sobu woblicył inflacisku ratu a tak dalej. Tak pśiźo na sumu 1,4 milionow euro wěcej, ako nam pó financnem dogronje k dispoziciji stoje. Ceła studija jo stakim knicomna. Tu w dogronje póstajonu sumu su se Serby ga górko wuwójowali. Z Vogtoweje studije wuchada, až by Serby trjebali wěcej pjenjez. To jo drje wěrno, ale zwótkul deje se te pjenjeze dobraś? Dalšny brach Vogtoweje studije jo, až naraźijo serbskim institucijam jano jadnučku wariantu, kótaruž ze swójskimi mócami sami do statka stajiś njamógu.
Lejna Theurichowa, pśedsedarka Rady załožby za serbski lud: Pód internetneju adresu www.stiftung.sorben.com móžo sebje kuždy woglědaś pśedlažece pósuźowanje z wušej 1000 bokami, kenž jo se naźěłało pód nawjedowanim prof. Vogta. Zawěsće buźo cytaŕ wjelgin iritěrowany. Ja licym z mócnymi diskusijami a protestami. Až do 15. nowembra móžo kuždy swóje kritiki zapódaś pak na serbsku załožbu pak direktnje na Vogta.
My serbske cłonki Załožboweje rady zapódajomy pominanje na Vogta, až ma wón dopórěźiś (nachbessern) swój koncept. Źo wó alternatiwu. Co ga buźo, gaž njedajo se jogo naraźenje zwopšawźiś w tej abo drugej instituciji? Jadno naraźenje nam njedosega.
Horst Adam, cłonk župnego pśedsedarstwa Domowiny: Mimo wšych słabosćow zapśimjejo Vogtowe pósuźowanje wšake naraźenja, wó kótarychž dej se na kuždy pad diskutěrowaś. To płaśi tež za lěpše rědowanje serbskego šulstwa, což nastupa Witaj, Serbske šulske towaristwo, Šulu za dolnoserbsku rěc a kulturu. Wón naraźijo, to wšykno zjadnośiś. Wšake naraźenja Vogta su napšawdu rewolucionarne, by mógli byś na dobro serbstwa. Pódla su wšake brizantne wěcy, ako su njerealistiske, mjazy drugim to naraźenje zjadnośiś górno- a dolnoserbsku rěc. Za wjelgin problematiski mam, až prof. Vogt ma drje wěste ideje, ale serbske institucije njamaju žednu alternatiwu. Což nastupa Domowinu, by dejał naraźiś tśi warianty, kak by wóna mógła byś teke w pśichoźe prezenta a wažna za serbski lud.
A. D.
Komentary k artikeloju
Ja žycym sebje wot Casnika pśedstajenje Vogtoweje studije a wosebnje jogo naraźenjow za pśichod. Jano mało luźi ma cas, tak wjele bokow sam cytaś.
Popšawem by słuśało take pśedstajenje pśed te komentary...