Madlena Norbergowa – nowa županka w Dolnej Łužycy
Na głownej zgromaźinje Domowinskeje župy Dolna Łužyca w Janšojcach jo se wobźěliło 73 delegatow z kupkow a towaristwow
Janšojce/Jänschwalde. Něźi pěś góźin jo warnowała 18. głowna zgromaźina Domowinskeje župy Dolna Łužyca w gósćeńcu „K lipje” w Janšojcach. Wót tych 100 pśepšosonych delegatow z kupkow a towaristwow su se na njej wobźělili dogromady 73. We swójej rozpšawje jo župan Pětš Petrick bilancu śěgnuł wó źěle župy pó 17. głownej zgromaźinje. We tom casu, tak jo zwěsćił, su sobuźěłaśerje regionalnego běrowa wuźaržowali stawny kontakt k pśedsedarstwam kupkow a k towaristwam, ako Domowinje pśisłušaju. Mimo togo su se teke łoni zasej pśewjadli decentralne wobradowanja w jadnotliwych kupkach abo gromaźe z wěcej kupkami. 15 jo jich było docełego. Na decentralnych kubłanjach łoni w nalěśu jo šło wó pśigótowanje dolnoserbskich pśedstajenjow wót Nimsko-Serbskego źiwadła Budyšyn, wó nadawki Domowiny pśi komunalnych wólbach a wó financielnu situaciju Serbow.
Na decentralnych kubłanjach nazymu jo mjazy drugim šło wó pśigótowanja na głowne zgromaźiny w kupkach a na głownu zgromaźinu Domowinskeje župy. Derje woglědane jo było zmakanje towaristwow w Serbskem domje, na kótaremž jo šlodarska mejstarka a Domowinarka ze Žylowa Doris Heinzowa pśednosowała wó wariantach burskeje swěźeńskeje drastwy a wó woblekanju drastwy k zapustam. Łońske zmakanje towaristwow jo było južor to 12. Rědnje by było, tak jo wuzwignuł župan, gaby se zastupniki Domowinskich kupkow a towaristwow tam a zas wobźělili na wobradowanjach župnego pśedsedarstwa, kótarež su zjawne.
Což nastupa Domowinske kupki, jo se slědujuce pśeměniło: Pśesłabe kupki z jano małučko cłonkami su se zjadnośili. To pśitrjefijo za kupce Běła Góra a Tšupc a kupce Zabrod a Dubrawa. Mimo togo njesmějo to wěcej byś, až se Domowinarje dwójcy lice: w kupce a pón hyšći raz, jolic su cłonki towaristwa, kótarež Domowinje pśisłuša. Pśez toś take wopšawnjone pominanje zboka Domowinskego zastojnstwa pśedlažy nět realna licba cłonkojstwa. Tak mamy tuchylu 37 Domowinskich kupkow z 1057 cłonkami. Gaž pśilicyjoš hyšći tych 928 cłonkow towaristwow, pón pśiźoš na eksaktnje 1985 Domowinarjow. Ku gluce njejo licba tych młodostnych Domowinarjow wjelika, ako su Łužycu spušćili: studijnego, wuwucowańskego abo źěłowego městna dla.
We swójej rozpšawje jo župan wuzwignuł až Domowinske młoźinske kupki su naźeja za župu Dolna Łužyca. Wjelgin wažne jo, až towaristwa a kupki swóje kontakty k wuknikam serbšćiny a Witaj-kupkam we domacnych źiśownjach nawěžu abo dalej wutwariju.
Na swójich dogromady šesć wobradowanjach jo se župne pśedsedarstwo teke zaběrało z wustawkami Domowiny. Cłonki pśedsedarstwa su na pśikład měnjece, až ma se župan w Dolnej Łužycy głownoamtski pśistajiś pak na 4 pak na 8 lět.
Za swójo dobre źěło su se na głownej zgromaźinje wuchwalili kupki Turnow, Hochoza a Rogow. Ako wjeraški w župje su se mjazy drugimi pomjenili serbska namša a pócesćenje pśi góźbje 60. pósmjertnego dnja fararja Bogumiła Šwjele w Dešnje (25.5.08), prědny źeń wótwórjonych źuri w Serbskem domje (19.6.08) z něźi 200 woglědarjami a 25. narodny źeń Domowniskego muzeja Dešno (10.–12.10.08)
Župan jo do swójeje rozpšawy zapśěgnuł fakty a licby, ako pótrjefiju Witaj-projekt. Palece problemy na Dolnoserbskem gymnaziumje su se jano cele krotko a poměrnje powšyknje narěznuli.
W diskusiji su powědali zastupny pśedsedaŕ Domowiny dr. Pětš Brězan, Horst Adam (Chóśebuz), Bernd Pittkunings (Dešno), Nicole Begerockowa (Lubin), Gertrud Hajderowa (Brjazyna nad jazorom) a druge. Pśedstajili su se kandidaty župy Dolna Łužyca za nowe Zwězkowe pśedsedarstwo Domowiny. Wuzwólowanje kandidatow ze wšyknych župow buźo na głownej zgromaźinje Domowiny 28. měrca w Chrósćicach. Tśo cłonki rewizijnego wuběrka su se w zjawnem wótgłosowanju wuzwólili.
W pótajmnem wuzwólowanju jo se nowe pśedsedarstwo z 13 cłonkami wuzwóliło. Z krejza nowo wuzwólonych cłonkow jo se (internje) wuzwóliła ako nowa županka dr. Madlena Norbergowa z Chóśebuza. Wóna co tu funkciju nejžpjerwjej jadno lěto wugbaś.
A. D.