Lětosa 1,2 miliona euro wěcej
Załožba za serbski lud jo wobzamknuła etat za lěto 2009
Budyšyn/Bautzen. Rada Załožby za serbski lud jo srjodu tyźeń wobzamknuła etat za lěto 2009. W nowem etaśe jo 17,25 milionow euro zaplanowanych, stakim 1,2 miliona euro wěcej nježli łoni.
Wuša suma, kótaruž załožba za pódpěranje a spěchowanje serbskeje kultury lětosa planujo, slědujo (folgen, resultieren) z pówušonych pśipłaśonkow Zwězka (Bund) a krajowu Bramborska a Sakska. Zwězk jo pó dłujckich rozestajenjach pśilubił, až swój późěl wó 600.000 euro na 8,2 miliona pówušyjo. Sakska a Bramborska cotej pó 300.000 eurach wěcej daś, tak až jeju pśipłaśonka se pówušyjotej na 5,85 milionow euro (Sakska) a 2,77 milionow (Bramborska).
Njeglědajucy na to pówušenje wóstanjo 1,1 milion euro wót tych pjenjez nejpjerwjej zastajony (how: gesperrt). Zawina jo, až Zwězk jo swój pśipłaśonk zastajił do casa, až Sakska a Bramborska swójej późěla (Anteile) na wěžecy part (verbindlich) pśizwólijotej. Doněnta njejo se to hyšći stało. Zastupniki wobeju krajowu w raźe załožby pak su signalizěrowali, až kraja buźotej tu sumu zebraś.
Wuškowne 308.000 euro wugóspodarijo załožba sama ze swójimi nabrankami.
Marko Suchy, direktor załožby, měni, až nowy etat za lěto 2009 zepěra se na solidny fundament. To buźo prědny raz w slědnych lětach, až mógu se zasej inwesticije pśewjasć. Lětosa chopiju toś pśetwarjowaś a modernizěrowaś Serbski muzej w měsće, a w Serbskem domje w Budyšynje zatwarijo se lift za zbrašne.
Weto wudajo se wětšy źěl tych pśidatnych pjenjez za personalne kosty, kótarež na zakłaźe tarifa se pówušyju.
Tšachota, až muse źěłowe městna na pólu serbskeje kultury se wótpóraś, jo nejpjerwjej wótchylona. Weto njamóžo direktor załožby mimo starosćow do pśichoda glědaś. Pśeto nichten njewě, kaka buźo situacija w lěśe 2010. Pśecej ga hyšći caka załožba na wěžece financne dogrono k financěrowanju serbskeje kultury na wjele lět.
Nowy etat Załožby 2009
Planowane wudawki
Serbski ludowy ansambel: 4,8 mio. € (+330.000 €)
Serbski institut: 1,7 mio. € (+ 51.000 €)
Nakładnistwo Domowina: 2,6 mio. € (+ 72.000 €)
Serbski muzej w Budyšynje: 389.000 € (+16.000 €)
Nimsko-serbski ludowy teater: 1,383 mio. € (+147.000 €)
Serbski muzej w měsće: 138.000 € (+ 0)
Šula za ds. rěc a kulturu: 84.000 € (+ 0)
Spěchowanje projektow: 912.000 € (+ 88.000 €)
Inwesticije: 260.000 €
G. W.