Z dobreju myslu do pśichoda
Wuspěšna bilanca na woklapnicy w Gatojcach
Hus/Maust. Ako južo łoni, tak teke lětosa su zastupniki gmejny Gatojce/Teichland, kótaruž twórje jsy Barbuk, Nowa Wjas a Hus, měli wjele pśicynow (Grund, Anlass), aby se wjaselili. Na woklapnicy pětk wjacor w gmejnskem domje w Husu su mógli na wuspěšne (erfolgreich) lěto slědk zglědowaś. Až su wobydlarje ze šołtami spokojom, jo se pokazało teke w komunalnem wuzwólowanju 2008: Šołta Noweje Jsy a cełeje gmejny Helmut Geissler, šołta Barbuka Wilfried Neuber a šołta Husa Harald Groba su wordowali hyšći raz wuzwólone, pśi comž wobźělenje na njom jo było nejwuše w cełem amśe Picnjo, rozmjej wušej 79%!
Wobydlaŕ licy to k wuspěcham, což jogo móšynku žari. How jo mógał šołta Helmut Geissler wjele nalicyś. Płaśenja za njerěšnu wódu su w Gatojcach, njeglědajucy na pówušenje, nejniše w cełem wokrejsu. Wóda jo tunja a jeje płaśenje njejo se pówušyło. Gmejna jo wjele dobrego napórała za to, aby familije ze źiśimi se how derje culi: Płaśonki za źiśownju su se znižyli, a kužde góle namakajo how město w źiśowni, teke te źiśi, kótarež njamaju pó kaznjach pšawo na to. Pśi naroźenju kuždego góleśa płaśi gmejna starjejšym „kmótšojski pśipłaśonk” we wusokosći 1.000 €. Wobydlarje njemuse nic płaśiś za wutwaŕ drogow, za drozne wobswětlenje (Straßenbeleuchtung) a za rěšenje drogow. Slědkoju móžo gmejna gjarda byś, až wót wšogo zachopjeńka maju wjelgin niske a stawne płaśonki za kjarchob. Wušej togo pódpěra gmejna źěło towaristwow ze 10.000 €, teke 10.000 € wudajo gmejna za swěźenje, źož se tradicije woplěwaju. Źěło ze seniorami pódpěra gmejna z 7.000 €.
Slědkoju jo gmejnske zastojnstwo źěłodawaŕ: w źiśowni źěła pěś wótkubłarkow, wušej togo maju w gmejnje pěśoch gmejnskich źěłaśerjow, ako źěłaju połnje, jaden na bazy myta liconego pó štundach a tśo na bazy komunalnego kombi-myta.
Gmejna ma teke na góspodarskem pólu wjele wuspěchow. Nowy rozwjaseleński park jo se wopokazał ako dobra iwesticija a jo napórał indirektnje źěłowe města. Gmejna jo wše twarske nadawki dała domorodnym firmam a jo sobu se za to starała, až se źěłowe města zeźaržyju.
Ako inwesticiju do pśichoda, kótaraž ma bejnje wjeliki wóznam, jo šołta pomjenił załoženje gmejnskeje załožby „Teichlandstiftung”. Załožba buźo spěchowaś towarišnostne (gesellschaftlich) žywjenje w gmejnje a pódpěraś cile, ako su za wše wužytne. Gmejna buźo pśipłaśowaś załožbje, gaž změjo wuzbytki, a teke bogate firmy – pśedewšym Vattenfall – su kazane załožbu pódpěraś.
Slědkoju jo se šołta wuźěkował wšym towaristwam za cesnoamtske źěło a wobydlarjam za zapódane ideje (na pśikład napóranje chódnika pśi Janšojskej droze). „Mimo našych wobydlarjow njeby my teliko wuspěchow měli”, jo gronił
Na woklapnicy w Gatojcach jo nagrono źaržała teke direktorka amta Picnjo Elvira Hölznerowa. Wóna jo wuchwaliła, kak wjele woglědarjow jo pśiwabił nowy rowjaseleński park „Erlebnispark Teichland”. „To jo dobry zakład za dlašne pilnowanje na pólu wuwijanja turizma”. Amt ma dalšne projekty planowane: W Picnju buźo se wobnowiś citadela, kólasarska drožka z Prjawoza pśez Luborasku gólu do Gójaca dej se twariś a na brjoze pśiducnego Chóśebuskego mórja dej se twariś wjelicki moderny rozglědowański torm. Turizm dej w góspodarstwje gmejny wětšu a wětšu rolu graś.
W slědnem źělu woklapnice su pśibytne wiźeli na płachśe power-point-prezentaciju žywjenja w gmejnje w starem lěśe. Wugbaśa sportarskego towaristwa, kólasarskego towaristwa a wognjoweje wobory su se wuzwignuli. Zasłužone wobydlarje su wordowali pócesćone z gmejnskeju medalju a znamuškom z woponom gmejny, mjazy nimi Rudi Mitschke za natwaŕ młoźinskeje wognjoweje wobory.
Gatojce w licbach
– W gmejnje jo było łoni 1249 wobydlari žywych (lažke spadnjenje).
– Naroźiło jo se 11 źiśi (šesć w Barbuce, styri w Husu a jadno w Nowej Jsy)
– Wumrěło jo 9 wobydlarjow.
– Pśiśěgnuło jo 31 luźi (do Barbuka 10, do Husa 15 a do Noweje Jsy 6), wěcej pak jo jich wuśěgnuło.
– Spomnjeśa gódne inwesticije: Dom wognjoweje wobory jo se łoni wuswěśił; gmejna jo dała cerkwi w Picnju 60.000 € za pórěźenje kšywa; drugi źěl rozwjaseleńskego parka z nowymi atrakcijami buźo se twariś;
G. W.