Patrick Meintz jo tenraz njasł klampawu
15 źowćow a 8 gólcow Kita „Małe myški” su swěśili 10. zapust
Prjawoz/Fehorw. W Prjawozu zapustuju tśi raze ze swěźeńskim pśeśěgom: źiśi, fryjne a ženjone. Tyźeń njeźelu su směli nejmłodše wót Prjawoskeje Kita ze serbskim mjenim „Małe myški” ako prědne swój zapust swěśiś. Rědne drastwy su źowćam woblekali doma pak mamy pak stare mamy. Jadna z pilnych woblekarkow jo była Kathrin Meintzowa. „Wjele som nawuknuła na woblekańskem kursu z Doris Heinzoweju. Wót togo casa som se pón sama pilnowała pśiwuknuś to a druge. Pśed lětźasetkom su źiśi našeje Kita prědny raz zapustowali. Prědnej dwě lěśe su gótowali samo dwójcy. Raz wu nas w Prjawozu, raz w Smogorjowje. Dla togo jo ten lětosny pópšawem južor ten styrnasty zapust”, jo nam wujasniła kněni Meintzowa. Jeje źowka Lisa-Marie (13), ako źinsa chójźi na Dolnoserbski gymnazium, jo była tegdy prědk 10 lět mjazy tymi nejmłodšymi zapustarkami.
Lětosa jo jeje syn Patrick (8) slědny raz pódla był. Z cylinderom na głowje, w carnem woblaku, běłem zgle a z carno-běłeju muchu jo směł tu klampawu njasł. Kathrin Meintzowa jo za jubilejny źiśecy zapust woblekała Lüttichojc Enolu (8) a Müllerojc Johannu (8). Wobej źowći chójźitej do horta. Johanna, źowka rewěrnego gólnikarja, wuknjo rowno tak ako Patrick Maintz w Brjazyńskej šuli serbski. Wobej to pśewšo woblutujotej, až słušatej lětosa k tym, z kótarymiž budu źiśi-zapustarje se rozžognowaś. Wótpołdnja pśi kafejpiśu w Marakojc kjarcmje we Smogorjowje buźo to dostojne rozžognowanje. Patrick jo wótrosł we familiji, ako źaržy na serbske tradicije. Maś jo južor wót 15. žywjeńskego lěta zapust sobu swěśiła a źinsa z cłowjekom gótujo sobu na muskecem zapusće.
Napoł dweju wótpołdnja su se wjednica Diana Altmannowa Kita a jeje kolegowki ze swójimi „Małymi myškami” zmakali w zalu Lukasojc kjarcmy. How su se póry zestajali a rejki rejowali. Hochoska kapała „Plonowa combo” jo k tomu grała. Źiśece rejki, walcer a Luxemburger su źiśi pśed zapustom w Kita zwucowali. Ceło pó pśikłaźe młoźiny su tradicionalne ceremonije na zalu wótběgowali. To jo se spódobało starjejšym, starym starjejšym a narskim wejsanarjam.
11 pórow jo pón śěgnuło na dwór šołty gmejny Smogorjow-Prjawoz Hansa-Joachima Emmricha a na dwór wejsneje šołty Joachima Balka. Pótom jo ceła zapustowa mań we „shatelowem busu” dojěła do susednego Smogorjowa. Bernd Lukas jo ze swójim traktorom śěgnuł pśípowjesak połny źiśi a wótkubłarkow. We Smogorjowje su zapustarje swóju cesć wopokazali wejsnemu šołśe Hubertusoju Bramarju.
Fota wó 10. jubilejnem zapusće Prjawoskeje Kita „Małe myški” móžośo sebje woglědaś w interneśe pód www.nowycasnik.de.
A. D.